Nesti contestu de guerres, retrocesos sociales y ofensiva neolliberal contra los derechos conquistaos, el Primeru de Mayu vuelve recordamos una verdá esencial: namás la unidá y la llucha de la clase trabayadora pueden abrir un horizonte d’emancipación. Frente a la división, la resignación y l’escaezu, esta xornada llámanos a recuperar la conciencia de clase, la organización colectiva y la memoria de quienes conquistaron col so esfuerciu los derechos que güei tán en peligru.
Otra vez más, llegamos al Día Internacional de la Clase Trabayadora bien lloñe de la unidá de clase. De fechu, los conflictos bélicos n’Ucraína, Irán, Sudán, Birmania, etc., mantienen a trabayadores de distintos países matándose entre sí pa meyorar los márxenes de ganancia del capital. Amás, el pueblu palestín sigue tando sometíu a un xenocidiu orquestáu pol criminal Netanyahu y consentíu polos Estaos Xuníos cola UE mirando pa otra parte, y ta por ver el destín del pueblu kurdu con Erdogán presionando per un llau y el nuevu gobiernu siriu pel otru. Estes guerres, amás d’otres polémiques orquestaes polos altavoces del réxime, fienden tamién ideolóxicamente a les clases trabayadores de los países non directamente participantes nes guerres. Fálase de tolo que divide, pero non de lo que pueda provocar sentimientu d’unidá de clase, como les condiciones materiales.
Podría dicise, entós, que la primer gran derrota que güei sufrimos como clase nun ye namás salarial, llaboral o material, tamién ye política, moral y simbólica: la perda de conciencia d’un destín común ente trabayadores de distintes tierres. Cuando’l capital consigue que la nuestra mirada se desvíe escontra conflictos presentaos en clave nacional, identitaria o xeopolítica, y non escontra la esplotación compartida que sufrimos, el movimientu obreru retrocede y l’internacionalismu esfarrápase. Precisamente por eso’l Primeru de Mayu caltién la so vixencia: porque nun ye namás una fecha del calendariu, ye una llamada a recomponer esa conciencia de clase, a recuperar la memoria de les lluches comunes y a volver poner nel centru la necesidá d’organización, solidaridá y combate compartíu contra un sistema que vive de la nuestra división.
Precisamente por eso, el Primeru de Mayu nun tien de ser entendíu como un día de fiesta nin de lliturxa, ye un día de llucha y conmemoración. Recordamos una fuelga asocedida’l 1 de mayu de 1886 en defensa de la xornada llaboral de 8 hores. Una fuelga qu’en Chicago siguió los díes 2 y 3, que reprimieron con crueldá matando xente, hasta’l 4 de mayu, cuando les fuercies del orde cometieron la masacre de Haymarket, con un númberu de baxes pergrande, y un xuiciu fraudulentu que condergó a muerte a munchos cabezaleros sindicales (los mártires de Chicago). Asina, el Primeru de Mayu ye una xornada de llucha sindical pola meyora de los derechos de la clase trabayadora, pero tamién de memoria y alcordanza del sangre vertío pol movimientu obreru organizáu en defensa de los derechos de los y les trabayadores, sangre que tiñe de colloráu a la bandera del proletariáu internacional, y que val como filu conductor con aquel primer movimientu emancipatoriu del proletariáu na Comuña de París.
Y ye que los derechos de la clase trabayadora nunca fueron de baldre: nin la xornada de 8 hores, nin el derechu a les vacaciones pagues, nin el derechu a una pensión de xubilación… tampoco los derechos a la enseñanza pública. Magar el funcionariáu tuvo tradicionalmente más derechos llaborales que’l restu de trabayadores, estos nun vinieron daos por nengún regalu d’un benefactor Estáu nin, muncho menos, por una suerte de pactu siniestru pol cual l’Estáu ufierta al funcionariáu una especie de posición de privilexu en cuenta d’actuar como’l so axente, tal que denuncien incansablemente los neolliberales nel so enfotu privatizador.
De fechu, les condiciones llaborales ventaxoses del funcionariáu débense a dos factores: una fuerte sindicalización, y les necesidaes del propiu Estáu, nel marcu d’una economía de mercáu, pues, al competir coles empreses privaes pola meyor mano d’obra, tien d’ufierta-yos les meyores condiciones o, siquier, unes condiciones que faigan apetecedor un puestu de trabayu colo que supón de difícil aprobar una oposición.
Sicasí, tamos agora nuna situación distinta: la progresiva terciarización de la economía amenorga la necesidá de competencia ente l’Estáu y el sector priváu por una plantiya de trabayadores con bona cualificación. Esto amenorga la necesidá del sistema públicu d’ufiertar bones condiciones llaborales a los y les sos trabayadores. Entá más, dada la presión de los organismos de corte neolliberal (la patronal, organismos internacionales como la OCDE, la banca…) pa endelgazar l’estáu del bienestar l’Estáu non solo nun se ve incentiváu a ameyorar les condiciones llaborales, sinón tolo contrario, a empiorales.
Poro, nesti contestu más que nunca ye necesaria la unidá d’acción de los y les trabayadores de la res publica, enmarcada na movilización sindical y la llucha colectiva polos nuestros derechos llaborales. Ye bona prueba d’ello que depués de décades ensin casi movilizaciones nun hubo prácticamente avances nos derechos llaborales de los docentes, pero depués de la fuelga de finales del cursu 24/25 algamáronse la mayor cantidá de meyores llaborales de les últimes décades. Nun ye casualidá: los derechos nun se regalen, conquístense lluchando.
Dende esi convencimientu, afirmamos que’l SUATEA ye un sindicatu de clase y de cai. Porque sí, creemos na negociación y, de fechu, ponémosla en práctica, pero entendemos que la fuercia pa ganar posiciones nes negociaciones surde nes lluches na cai. Por eso entendemos que la función del sindicalismu de clase nun ye namás dir a negociar coles patronales o cola alministración, ye (y de fechu ye’l llabor más importante) organizar a la clase trabayadora pa que lluche na cai.
Dende va años yá nun tamos solos nesta llucha. Siempre fuimos un sindicatu de clase, pero en casi 50 años nun fuimos a construyir un sindicatu multisectorial precisamente pa representar y organizar a tola clase trabayadora. La nueva Intersindical Asturiana, de la que SUATEA ye’l so referente na enseñanza, ye yá una realidá que nos sitúa nun escenariu muncho más ambiciosu pero tamién muncho más potente pa defender a la clase trabayadora.
Y ye que solos nun tenemos futuru. La unidá de la clase trabayadora ye indispensable pa recorrer esti camín, porque vamos bien lloñe. Nun somos un sindicatu de servicios. Nun somos un sindicatu gremial que tien como finalidá única meyorar les caxigalines del día a día. Nós somos una organización de clase, sociopolítica, tresformadora, que tien como finalidá acabar coles inxusticies propies d’esti sistema económicu: acabar cola explotación llaboral, cola contradición ente trabayu y capital, cola desigualdá de clases y, en suma, algamar la emancipación total de los y les trabayadores.
Agora bien, el sindicalismu ye una llucha que, magar pon los sos oxetivos bien lloñe, sofita la so base nel trabayu diariu y camina pasu ente pasu nes propuestes concretes qu’ameyoren la calidá de vida de la clase trabayadora. Nun se trata nin d’asaltar nengún cielu, nin de tomar el Palaciu d’Iviernu. Na mayor parte de la historia del movimientu obreru los trunfos nun s’algamaron asina, sinón, les más de les veces, con socesives conquistes llaborales. La suma de munchos llogros concretos ye la que llevó a les clases trabayadores europees a esfrutar del estáu del bientar y d’unos derechos llaborales qu’adulces vamos perdiendo y que, si siguimos así, vamos perder por completo. Si queremos ver el futuru de lo que mos espera si el neolliberalismu rampante termina por acabar coles conquistes de más d’un sieglu de llucha obrera, podemos mirar a Arxentina: el gobiernu de Milei aprueba la xornada llaboral de 12 hores y el pagu n’especie. Ver el sielgu XXI avanzar ye como ver rebobinar la primer metá del sieglu XX.
Agora la decisión ye de toes y toos: podemos siguir pela sienda aniciada cola fuelgona educativa (que ye la de la movilización y la llucha) y siguir progresando poco a poco na conquista de derechos, o podemos volver a dormir el sueñu de los xustos 20 años.
El sindicalismu de clase asambleariu, alternativu y autofinanciáu ye más necesariu güei que nunca. Si quies avanzar nesta llucha, movilízate, organízate nel to centru, afíliate y llucha.
¡Viva’l Primeru de Mayu!
¡Viva la llucha de la clase obrera!
Puedes ver esti artículu y otros más nel boletín 204 de SUATEA: https://suatea.org/boletin-suatea-204-y-manifestacion-1u-mayu-en-xixon/